Qanuippitaa? Kanatami Inuit Anniaktulikinikut Naunaiyainik Aullagotaoyok tamanani Nunavumi
Ubluani: July 18, 2024
Qanuippitaa? Kanatami Inuit Anniaktulikinikut Naunaiyainik Aullagotaoyok tamanani Nunavumi
(July 18, 2024 - Iqaluit, Nunavut) Nunavut Tunngavik Timingat (NTI-kut) aullakutihimaliktot haffuminga hadja havagiyaoliktomik Qanuippitaa? Kanatamil Inuit Anniaktulikinikut Naunaiyainik, tatva innighihimaliktot naunaiyaiyakvigivlugit tatvani Mittimatalikmi una tatkikhiot attoktitlugo. Sanikiluaq, Sanirajak tatvalo Urhuqtuq havakvionialikmiyot nunaliit naunaiyakvigilugit, ukkua Qanuippitaa?
Hunamik pitjutaova hamna Qanuippitaa? Ihomagivlugit illingaiyaotigiyomavlugit anniaktailitjutighaitnik tatvalo innutiakutighaitnik hapkua Nunavumiut Inuit aghughagahoaklogit hapkua anniaktailinikut tatvalo innulikinikut maligaoyut tatvalo havagiyaoyot. Hamna naunaiyaitjutaoyok ihuaghaktaohimayok tatvalo nanminigiyaovlutik Inuinakniit. Tahapkua naunaiyaotait katighoktaohimayot Nunavumi nanminiginiaktait tatvalo totkomayaolotik kiiliktaohimalotik kagitaoyaitni ukkua NTI-kut, malikayagiakakniaktot kinamut atoktitaoniakmangata hapkua unipkagiyaohimayot naunaiyaotit. Pikataoniaktot naunaiyaotaitni ikkayoniaktot nalunangitok unipkakataklotik kanok hapkua Inuit anniaktailitjutaitnik tatvalo innutiakutaitnik, pitjutaovalianiakmata hivunighami havagiyaoyoghanik tatvalo maligaliokutighait nallaomagiakovlogit ihagiagiyaoyonik pinahuakutighanik Inuit piyomayaitnik hivuliokjutaoyagiakaktoniklo tahamani Nunavumi.
“Aghughakatka hapkua tamaita Inuit tikoaktaohimayot pikataotkovlogit tahapkunani naunaiyaotaoyoni, tatva hapkua unipkagiyaoyot naunaipkutaoniakmata ihomaliokutaolotik ikpigiyaitnik innuhiitnik tamaita Inuit.” ukkalaktok NTI-kut Angayokangat, Aluki Kotierk. “Tahamna uktutaoniaktok Inuinait unipkaklotik tohaktitiyagiakaktot, pikataokataklotik tahapkuninga anniaktailinikut naunaiyaotaoyunik tamanani Nunavumi, tatvalo aghoghakataklogit kanok tahamna naunaiyaotaoyok atoktaoniakmangata.”
Inuit huli pikkuyaoyut uktogahoaklotik tahapkunani naunaiyaotaoyuni havaghaghiokvigilugit akiliktaoniakmata havaktot. Qanuippitaa? Havaktighaghiokniaktot tamaitni 25-ni Nunavut nunaliitni, ilihaktitaoniaktutlo akkiliktoktaolotik.
Iliitogivaligomagovit tatvalo tohakvigikataklogit ukkua Qanuippitaa? Tatvalo tohakviginahuaklogit kakugo tahamna naunaiyainik havagiyaoniaka tahamani nunagiyaakni takkuklugo una kagitaoyakukutaat titigakvigilugo una info@qnihs.ca. Uktuinagialiuyutit akkinahuakluni haffuminga kagitaoyagalaakmik, malikalugo tatvalo tuhaktitikataklotik haffuminga Qanuippitaa? Innulikinikut takkughaokataktonik tatvan Facebook-mi tatvalo Instagram-mi @QNIHSNunavut
Kanogininga haffuma Qanuippitaa? Kanatami Inuit Anniaktulikinikut Naunaiyautait
Qanuippitaa? Kanatami Inuit Anniaktulikinikut Naunaiyautait havagiyaoyok tatvalo tugaghimayok Inuinaknut tatvalo avalikangitok Inuit-hivulikhutjuk anniaktulikinikut naunaiyaotaoyok tatvalo pikangitok ahianik Inuit-hivulikhutjuk anniakulikinikut naunaiyaotauyok ublumi illaliotivlugit tamaita hapkua Inuinait tamaitnik ukkiukaktunik tamaitnin nunaliitnit humilikak Kanatami hitamaoyuni Inuit Nunangani aviktughimayoni. Ukkua QNIHS-kut tahamani Nunavumi ikkayoghaoniaktot illingaiyaotighaitnik anniaktailitjutighanik tatvalo Inuit innutiakutighaitnik tahamani Kanatami aghoghagahuaklogit hapkua Inuit anniaktailinikut tatvalo innulikinikut innutiakutighaitnik maligaoyut tatvalo havagiyaoyot havagilogit hapkua katighuikataklotik piyominaktonik unipkagiyaoyonik naunaiyaotaitnik iliitkuhigiyaitnik hapkua Nunavumiut Inuinait. Ukkua QNIHS-kut havagiyaokatakniaktot tahamani Nunavumi talimat ukkiut naatagaikpata.
Iliitkohiit ukkua Nunavut Tunngavik Timingat
Nunavut Tunngavik Timingat (NTI-kut) aghughakataktait ukkua Kavamatkut havagiyagiakakmatjuk hapkua ukkaotigikataktamingnik atoghutjuk tahamna Nunavumi Angikutaohimayok. Inuit himighihimangmata hapkuninga Nunakakaktot angikutaitnik hapkuninga tamaitnik pitkuhitokaiknik nunautimingnik tatvani Nunavumi Nunatakutaita Angikutatni piyunaotikagomavlutik tatvalo ikkayohiagomavlotik tahapkuninga titigaghimayonik tatvani Nunavut Angikutatni. Tahamna munagitjutighat nunanik, immaknik tatvalo angutighanik pimagiongmata Inuinaknut. NTI-kut ihuaghaikataktot tatvalo munagivlugit hapkua tamaita Inuit munagiyaghaitnik titigaghimayonik tatvani Nunavut Angikutatni tatvalo amigiyait hapkua kavamatokatkut tatvalo Nunavumi Kavamatkut havagiyagiakakmatjuk tahapkua havagiyagiakaktaitnik.
