ᖃᓄᖅ ᑐᓴᖅᑕᐅᔭᕆᐊᖃᙱᑦᑐᖁᑎᒃᑲ ᓴᐳᔾᔭᐅᓯᒪᓂᐊᖅᐸᑦ?
ᑖᓐᓇ ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑎᑦ ᑐᓴᖅᑕᐅᔭᕆᐊᖃᙱᑦᑐᓂᒃ ᐊᒻᒪᓗ ᑲᙳᓇᖅᑐᖁᑎᖏᓐᓂᒃ ᐃᓚᐅᔪᑦ ᐱᕐᔪᐊᖑᒍᓱᒃᑐᑦ. ᐅᖃᖃᑎᒌᖕᓂᕐᒧᑦ ᑐᓴᐅᒪᔾᔪᑏᑦ, ᓲᕐᓗ ᐊᑏᑦ ᐊᒻᒪᓗ ᑐᕌᕈᑏᑦ, ᑐᖅᑯᖅᑕᐅᓯᒪᓲᑦ ᐃᓛᒃᑯᑦ ᐱᔭᕇᖅᑕᐅᓯᒪᔪᓂ ᐊᐱᖅᓲᑎᓂ. ᑕᒪᓐᓇ ᑐᑭᖃᖅᑐᑦ ᑭᓇᑐᐃᓐᓇᖅ ᑕᑯᔪᓐᓇᙱᑦᑐᖅ ᐃᓚᐅᔫᑉ ᐊᑎᖓᓂᒃ ᐊᒻᒪᓗ ᑭᐅᔾᔪᑎᖏᓐᓂᒃ ᑲᑎᙵᑎᓪᓗᒋᑦ. ᑕᒪᐃᓐᓂᓗᒃᑖᖅ ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑎᑦ ᐱᓕᕆᖃᑎᒌᑦ, ᐊᑐᔪᓐᓇᖅᑐᑦ ᐊᐱᖅᓲᑎᓄᑦ ᑭᐅᔾᔪᑕᐅᔪᓂᒃ, ᐊᑎᓕᐅᖅᓯᒪᔪᑦ ᑐᓴᖅᑕᐅᔭᕆᐊᖃᙱᑦᑐᓄᑦ ᐊᖏᕈᒻᒥᒃ, ᓴᐳᔾᔨᓯᒪᓪᓗᓂᓗ ᑐᓴᖅᑕᐅᔭᕆᐊᖃᙱᑦᑐᑦ ᑭᐅᔾᔪᑕᐅᔪᑦ. ᑐᓴᐅᒪᔾᔪᑏᑦ ᑐᓂᔭᐅᔪᑦ ᐃᓚᐅᔪᓂᑦ ᑲᙳᓇᖅᑑᑎᑕᐅᖏᓐᓇᕐᓂᐊᖅᑐᑦ ᐊᒻᒪᓗ ᐊᑐᖅᑕᐅᓗᑎᒃ ᓈᓴᐅᓯᕆᔾᔪᑎᓄᑦ ᐱᔾᔪᑎᖃᕐᓗᑎᒃ ᑭᓯᐊᓂ. ᑖᓐᓇ ᑐᑭᖃᖅᑐᑦ ᑕᒪᓐᓇ ᐊᐱᖅᓱᕐᓂᕐᒥ ᑭᐅᔾᔪᑏᑦ ᑲᑎᑕᐅᓂᐊᖅᑐᑦ ᐊᒥᓱᓄᑦ ᐊᓯᖏᓐᓄᑦ ᑭᐅᔾᔪᑕᐅᔪᓄᑦ ᐊᒻᒪᓗ ᓴᖅᑭᑕᐅᓗᑎᒃ ᐅᓂᒃᑳᓕᐊᖑᓗᑎᒃ ᑕᒪᐃᓐᓂᓗᒃᑖᖅ ᓈᓴᐅᓯᕆᔾᔪᑎᓄᑦ. ᐊᑕᐅᓯᖅ ᐊᔾᔨᐅᔪᖅ ᓈᓴᐅᓯᕆᓂᕐᒧᑦ ᐃᒪᐃᑦᑑᔪᖅ, “ᐳᓴᓐ-ᖓ ᐃᓄᐃᑦ ᐅᖃᖅᑐᑦ ᐱᐅᔪᓪᓚᕆᒃᑐᖅ ᐅᕝᕙᓘᓐᓃᑦ ᐱᐅᔪᖅ ᐋᓐᓂᐊᖃᖅᑕᐃᓕᒪᓂᖅ.”
ᐱᒻᒪᕆᐅᕗᖅ ᐅᖃᐅᓯᕆᓗᒍ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᕗᑦ ᒐᕙᒪᖏᑦ ᑕᑯᓂᐊᕈᓐᓇᕋᔭᕐᒪᑕ ᓄᓇᓕᓐᓂ ᑐᙵᕕᓖᑦ ᑐᑭᓯᒋᐊᕈᑎᖏᖕᓂᒃ ᐱᓕᕆᐊᓕᐅᕈᑎᓕᐅᖅᑎᓪᓗᒋᑦ. ᑕᐃᒪᐃᓗᐊᕐᓂᐅᓴᙱᒃᑲᓗᐊᖅᑎᓪᓗᒋᑦ, ᑕᒪᓐᓇ ᑕᑯᓂᐊᕈᓐᓇᕋᔭᕐᓂᖏᑦ, ᐱᖃᓯᐅᑎᓗᒋᑦ ᐊᓯᖏᑦ ᐃᓄᐃᑦ ᖃᓄᐃᑦᑑᓂᖏᑦᑕ ᑐᑭᓯᒋᐊᕈᑎᖏᑦ, ᑕᒪᒃᑯᓂᖓ ᑲᑐᔾᔨᖃᑎᒌᓂᒃ ᓈᒻᒪᑦᑐᓂᑦ ᓇᓗᓇᐃᖅᓯᒐᓚᒍᓐᓇᕈᑕᐅᒐᔭᖅᑐᑦ ᓇᓗᓇᐃᖅᑕᐅᒃᑲᓐᓂᖁᓪᓗᒋᑦ ᑭᒃᑯᑦ ᐃᓚᐅᖃᑕᐅᒍᓐᓇᕋᔭᕐᓂᖏᖕᓂᒃ ᒪᓕᑦᑐᒋᑦ ᖃᓄᐃᑦᑑᓂᖏᑦ ᐃᓄᐃᑦ.
