ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᖅ ᐱᒋᐊᖅᑎᑕᐅᓯᒪᓕᖅᑐᖅ ᓄᓇᕗᒻᒥ
ᐅᓪᓗᖓ: July 18, 2024
ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᖅ ᐱᒋᐊᖅᑎᑕᐅᓯᒪᓕᖅᑐᖅ ᓄᓇᕗᒻᒥ
(ᔪᓚᐃ 18, 2024 - ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᓴᖅᑮᑎᑦᑎᒋᐊᖅᓯᒪᓕᖅᑐᑦ ᐱᒋᐊᖅᑎᑦᑎᓯᒪᓕᖅᑐᑎᑦ ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᕐᒥᒃ, ᖃᐅᔨᓴᕇᖅᓯᒪᓕᖅᑐᑎᑦ ᒥᑦᑎᒪᑕᓕᖕᒥ ᑕᒫᓂ ᑕᖅᑭᖅ ᐱᒋᐊᕋᑖᖅᑐᒥᓂᐅᑎᓪᓗᒍ. ᓴᓂᑭᓗᐊᖅ, ᓴᓂᕋᔭᒃ ᐊᒻᒪᓗ ᐅᖅᓱᖅᑑᖅ ᑭᖑᓪᓕᐅᓂᐊᖅᑐᑦ ᓄᓇᓖᑦ ᖃᐅᔨᒋᐊᕐᕕᐅᓗᑎᑦ, ᖃᓄᐃᑉᐱᑕ?−ᒃᑯᑦ ᓂᐅᕐᕈᓛᖅᑐᑦ ᑖᒃᑯᓂᖓ ᓄᓇᓕᓐᓂ ᐋᒡᒌᓯᐅᓕᖅᐸᑦ. ᐃᓄᐃᑦ ᐊᑐᓂ ᓄᓇᓕᓐᓂ ᓂᕈᐊᖅᑕᐅᒐᔭᖅᑐᑦ ᐊᐱᖅᓱᖅᑕᐅᔪᒪᓗᑎᑦ.
ᐱᔾᔪᑎᖓ ᖃᓄᐃᑉᐱᑕ? ᐱᐅᓯᕚᓪᓕᖅᑎᑦᑎᒍᑎᒋᔭᐅᓇᓱᐊᖅᑐᖅ ᐋᓐᓂᐊᖅᑕᐃᓕᒪᖁᓪᓗᒋᑦ ᐊᒻᒪᓗ ᐃᓅᓯᖏᑦ ᖃᓄᐃᑦᑕᐃᓕᖁᓪᓗᒋᑦ ᓄᓇᕗᒻᒥᐅᑦ ᐃᓄᐃᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐃᓅᓯᕐᒥᒃ ᐱᕙᓪᓕᐊᑎᑦᑎᓂᕐᒧᑦ ᐊᑐᐊᒐᖏᑦ ᐊᒻᒪᓗ ᐱᓕᕆᐊᖏᖕᓂᒃ ᐊᔭᐅᕆᔾᔪᑎᒋᔭᐅᓗᑎᑦ. ᖃᐅᔨᓴᕐᓂᖅ ᐋᖅᑭᒃᓱᖅᑕᐅᓯᒪᔪᖅ ᐊᒻᒪᓗ ᓇᒻᒥᓂᖁᑎᒋᔭᐅᓪᓗᓂ ᐃᓄᖕᓄᑦ. ᑐᑭᓯᒋᐊᕈᑏᑦ ᓄᐊᑕᐅᔪᑦ ᓄᓇᕗᒻᒥ ᓇᒻᒥᓂᖁᑎᒋᔭᐅᓂᐊᖅᑐᑦ ᐊᒻᒪᓗ ᑐᖅᑯᖅᑕᐅᓯᒪᓗᑎᑦ ᓴᐳᒻᒥᐅᓯᖅᑕᐅᓯᒪᔪᒧᑦ ᖃᕋᓴᐅᔭᖅᑎᒎᖓᔪᑦ ᓄᓇᕗᑦ ᑐᙵᕕᒃ ᑎᒥᖓᓂ, ᒪᓕᒐᕋᓛᖃᕐᓗᑎᑦ ᐱᑐᐃᓐᓇᐅᙱᑦᑐᓂᑦ ᑭᒃᑯᓐᓄᑦ ᑕᑯᔭᐅᓇᓱᐊᖅᑐᖃᓕᕋᐃᑉᐸᑦ ᐊᒻᒪᓗ ᐊᑐᖅᑕᐅᓗᑎᑦ ᑭᒡᓕᓯᓂᐊᖅᑕᐅᓯᒪᔪᑦ. ᐃᓚᐅᖃᑕᐅᔪᑦ ᖃᐅᔨᓴᕐᓂᕐᒧᑦ ᐃᑲᔪᕋᔭᖅᑐᑦ ᐊᑑᑎᖃᑦᑎᐊᖅᑐᓂᑦ ᐅᓂᒃᑳᕐᓂᒃ ᐃᓄᐃᑦ ᐋᓐᓂᐊᖅᑕᐃᓕᒪᓂᖏᖕᓂᒃ ᐊᒻᒪᓗ ᖃᓄᐃᑦᑕᐃᓕᒪᓂᖏᖕᓂᒃ, ᖃᐅᔨᒪᑦᑎᐊᖅᑎᑦᑎᒍᑎᖏᔭᐅᓂᐊᕐᓗᑎᓪᓗ ᓯᕗᓂᒃᓴᒥ ᐱᓕᕆᐊᑦ ᐊᑐᐊᒐᓪᓗ ᐱᑦᑎᐊᖅᓯᒪᓂᖅᓴᒃᑯᑦ ᐊᔾᔨᖃᕐᓂᐊᕐᒪᑕ ᑐᑭᓯᐅᒪᒍᑎᒋᔭᐅᓗᑎᓪᓗ ᐃᓄᐃᑦ ᑭᙴᒪᒋᔭᖏᑦ ᐊᒻᒪᓗ ᓯᕗᓪᓕᐅᑎᖁᔭᖏᑦ ᓄᓇᕗᒻᒥ.
“ᑲᔪᖅᓴᖅᑕᒻᒪᕆᐊᓗᒋᕙᒃᑲ ᑕᒪᐃᓐᓂ ᐃᓄᐃᑦ ᓂᕈᐊᖅᑕᐅᓯᒪᔪᑦ ᐊᐱᖅᓱᖅᑕᐅᓗᑎᑦ ᑐᑭᓯᒋᐊᕐᓂᕐᒥᒃ ᐊᐱᖅᓱᖅᑕᐅᔪᒪᓗᑎᑦ, ᑐᑭᓯᒋᐊᕈᑏᑦ ᓄᐊᑕᐅᔪᑦ ᐊᑐᖅᑕᐅᒐᔭᕐᒪᑕ ᐃᓱᒪᓕᐅᕈᑎᖏᔭᐅᓗᑎᑦ ᐊᑦᑐᐃᓂᖃᕋᔭᖅᑐᓂᑦ ᐃᓄᐃᑦ ᐃᓅᓯᖏᖕᓂ.” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᑕᒪᓐᓇ ᐱᕕᖃᕈᑎᒋᔭᐅᕗᖅ ᐃᓄᖕᓄᑦ ᐅᓂᒃᑳᕐᓗᑎᑦ ᐅᓂᒃᑳᑦᑎᓐᓂ, ᐃᓚᐅᖃᑕᐅᑦᑎᐊᕐᓗᑎᓪᓗ ᐋᓐᓂᐊᖅᑕᐃᓕᒪᓂᕐᒧᑦ ᖃᐅᔨᓴᕈᑎᒋᔭᐅᔪᒥ ᓄᓇᕗᒻᒥ, ᐊᒻᒪᓗ ᐊᔭᐅᕆᔾᔪᑎᒋᔭᐅᒐᔭᖅᑐᑎᑦ ᖃᓄᖅ ᖃᐅᔨᓴᕐᓂᕐᒦᙶᖅᑐᑦ ᐊᑐᖅᑕᐅᒐᔭᕐᒪᖔᕐᒥᒃ ᑐᑭᓯᒋᐊᕈᑏᑦ.”
ᐃᓄᐃᑦ ᐃᓚᐅᖃᑕᐅᖁᔭᐅᒋᕗᑦ ᐊᐅᓚᑦᑎᓗᑎᑦ ᖃᐅᔨᓴᕐᓂᕐᒥᒃ ᐱᓇᓱᐊᕐᓗᑎᑦ ᐊᑭᓕᖅᓱᖅᑕᐅᔪᒧᑦ ᐃᖅᑲᓇᐃᔮ$ᓴᓄᑦ. ᖃᓄᐃᑉᐱᑕ? ᐃᖅᑲᓇᐃᔭᖅᑎᑖᓛᕆᕗᑦ ᑕᒪᐃᓐᓂ 25-ᓂᑦ ᓄᓇᕗᑦ ᓄᓇᓕᖏᖕᓂ, ᐱᓕᒻᒪᒃᓴᖅᑎᑕᐅᔪᓐᓇᕋᔭᖅᑐᑎᑦ ᐊᒻᒪᓗ ᐊᑭᓕᖅᓱᖅᑕᐅᓗᑎᑦ.
ᑐᑭᓯᒋᐊᒃᑲᓐᓂᖁᓪᓗᑎᑦ ᐊᒻᒪᓗ ᖃᓄᐃᓕᐅᓕᕐᓂᕐᒥᓂᒃ ᑐᓴᐅᒪᖁᓪᓗᑎᑦ ᖃᓄᐃᑉᐱᑕ? ᒥᒃᓄᑦ ᐊᒻᒪᓗ ᖃᐅᔨᖁᓪᓗᑎᑦ ᖃᖓ ᐊᐱᖅᓱᖅᑕᐅᔪᖃᓛᓕᕐᒥᒻᒪᖔᖅ ᓄᓇᓕᔅᓯᖕᓂ ᖃᕋᓴᐅᔭᖅᑎᒍᑦ ᑎᑎᕋᕐᕕᒋᑎᒍᑦ ᐅᕗᖓ info@qnihs.ca. ᓵᓚᒃᓴᕋᓱᖁᓪᓗᑎᑦ ᖃᕋᓴᐅᔭᕋᓛᕐᒥᒃ ᓇᕿᑎᒐᕐᒥᒃ, ᒪᓕᓪᓗᒋᑦ ᐊᒻᒪᓗ ᒪᑉᐱᒐᖓ ᑲᑐᑎᓗᒍ ᖃᓄᐃᑉᐱᑕ? ᖃᕋᓴᐅᔭᒃᑯᑦ ᐃᓅᖃᑎᒋᒍᑎ ᕙᐃᔅᕗᒃᑯᑎᒍᑦ ᐊᒻᒪᓗ ᐃᓐᔅᑎᒍᕌᒻ−ᒃᑯᑎᒍᑦ ᐅᓇ ᓇᕿᑦᑕᕐᓗᒍ @QNIHSNunavut
ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᖅ ᒥᒃᓵᓄᑦ
ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᖅ ᑲᒪᒋᔭᐅᕗᖅ ᐃᓄᖕᓄᑦ ᐃᓄᖕᓅᖓᓪᓗᑎᑦ ᐊᒻᒪᓗ ᑖᓐᓇᑐᐊᑦᑎᐊᖅ ᐃᓄᖕᓄᑦ ᓯᕗᒃᑲᖅᑕᕈᑕᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑭᓯᒋᐊᕐᓂᐅᕗᖅ ᐱᖃᓯᐅᔾᔨᔪᑦ ᑕᒪᐃᓐᓂ ᐅᑭᐅᓖᑦ ᐃᓄᐃᑦ ᓄᓇᓕᓕᒫᕐᓂ ᑲᓇᑕᓕᒫᕐᒥ ᑲᒪᒋᔭᐅᓪᓗᓂ ᑎᓴᒪᑦ ᐃᓄᐃᑦ ᐊᕕᑦᑐᖅᓯᒪᓂᖏᖕᓂ. ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᖅ ᓄᓇᕗᒻᒥ ᐃᑲᔪᕋᔭᖅᑐᖅ ᐱᐅᓯᕚᓪᓕᖅᑎᑕᐅᓗᓂ ᐋᓐᓂᐊᖅᑕᐃᓕᒪᓂᖏᑦ ᐊᒻᒪᓗ ᐃᓅᓯᖏᑦ ᖃᓄᐃᙱᓐᓂᖅᓴᐅᓕᕐᓗᑎᑦ ᐃᓄᐃᑦ ᑲᓇᑕᒥ ᐊᔭᐅᕆᔾᔪᑎᖏᔭᐅᓂᐊᕐᒪᑦ ᐃᓄᐃᑦ ᐋᓐᓂᐊᖅᑕᐃᓕᒪᓂᖏᑦᑕ ᐊᒻᒪᓗ ᐃᓅᓯᓕᕆᔭᐅᓂᖏᑦᑕ ᐱᕙᓪᓕᐊᒍᑎᖏᑦ ᐊᑐᐊᒐᑦ ᐊᒻᒪᓗ ᐱᓕᕆᐊᑦ ᓄᐊᑕᐅᓂᖏᖕᓂ ᐱᐅᔪᑦ ᑐᑭᓯᒋᐊᕈᑏᑦ ᑭᒡᓕᓯᓂᐊᕈᑎᒋᔭᐅᑦᑎᐊᕐᓗᑎᑦ ᐊᒻᒪᓗ ᑐᕌᖓᓂᖃᕐᓗᑎᑦ ᓄᓇᕗᒻᒧᑦ ᐃᓄᓐᓄᓪᓗ. ᖃᓄᐃᑉᐱᑕ? ᑲᓇᑕᒥ ᐃᓄᐃᑦ ᖃᓄᐃᓐᓂᖏᖕᓄᑦ ᑐᑭᓯᒋᐊᕐᓂᖃᓛᖅᑐᑦ ᓄᓇᕗᒻᒥ ᑕᒪᐃᓐᓂ ᑕᓪᓕᒪᑦ ᐊᓂᒍᕋᐃᑉᐸᑕ.
ᓄᓇᕗᑦ ᑐᙵᕕᒃ ᑎᒥᖓᑕ ᒥᒃᓵᓄᑦ
ᓄᓇᕗᑦ ᑐᙵᕕᒃ ᑎᒥᖓ ᖃᐅᔨᒪᑦᑎᐊᑎᑦᑎᓲᑦ ᒐᕙᒪᒃᑯᑦ ᑲᒪᒋᔭᖃᕋᓗᐊᕐᒪᖔᕐᒥᒃ ᐱᓕᕆᐊᕆᓂᐊᕐᓂᕋᖅᓯᒪᔭᖏᖕᓂ ᑕᐃᒃᑯᑎᒎᓇᖅ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ. ᐃᓄᐃᑦ ᑕᐅᖅᓰᓯᒪᕗᑦ ᓄᓇᖃᖅᑳᖅᓯᒪᔫᓂᖏᑦᑕ ᑎᒍᒥᐊᖅᑕᖏᑦ ᑕᒪᐃᓐᓂ ᓄᓇᑐᖃᖏᖕᓂᒃ ᓄᓇᕗᒻᒥ ᓄᓇᑖᖅᓯᒪᓂᕆᔭᖓᓂᒃ ᐱᔪᓐᓇᐅᑎᑖᕐᓗᑎᑦ ᐃᑲᔫᓯᐊᖅᑖᖃᑦᑕᕐᓗᑎᓪᓗ ᑎᑎᕋᖅᑕᐅᓯᒪᓪᓗᑎᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓂ. ᐊᐅᓚᑕᐅᓂᖏᑦ ᓄᓇᐃᑦ, ᐃᒪᐃᑦ ᐊᒻᒪᓗ ᓂᕐᔪᑏᑦ ᐱᒻᒪᕆᐊᓘᕗᑦ ᐃᓄᖕᓄᑦ. ᓄᓇᕗᑦ ᑐᙵᕕᒃ ᑎᒥᖓ ᐅᐸᓗᖓᐃᔭᐃᓲᑦ ᐊᐅᓚᑦᑎᓲᓪᓗ ᐃᓄᐃᑦ ᑲᒪᒋᔭᕆᐊᓕᒻᒥᓂᒃ ᑎᑎᕋᖅᓯᒪᔪᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥ ᐊᒻᒪᓗ ᖃᐅᔨᒪᑦᑎᐊᑎᑦᑎᓲᑦ ᒐᕙᒪᑐᖃᒃᑯᑦ ᓄᓇᕗᓪᓗ ᒐᕙᒪᖏᑦ ᐱᖁᔭᖅᑎᒍᑦ ᖃᓄᐃᓕᐅᕆᐊᖃᕐᓂᕐᒥᓂᒃ ᑲᒪᒋᔭᖃᕋᓗᐊᕐᒪᖔᕐᒥᒃ.
